يوم مطلعتلوش شمس :"(

بجد والله دا يوم مطلعتلوش شمس

اول مره اسمع كلمه ع الصبح وتعلق معايا والاقى فعلا ان الكلمه ماشيه معايا من اول اليوم لاخره

بس معتقدش ان بنت خالى لما قالت الجمله دى كانت عارفه اليوم دا هيعدى عليا ازاى

انهارده يوم الاتنين يعنى يوم العملى بتاعى رحت المدرسه

لما دخلت الفصل بتاعى كان فى ولد محضرش الاسبوع اللى فات واول مره اشوفه

دخلت طبعا والفصل وقف وفى كام واحد قاعدين قلت لهم هو مش انا دخلت

بس كان فى واحد قاعد ...قلت له قوم اقف وياريت لسانى اتقطع قبل ما اقول كده

لاقيته رد عليا وقالى وهو بيضحك

( انا مش بقف عشان انا مشلول )

يااااااااااااااااااااااااااااااااااااا الله :((

احساس لايوصف طبعا وقتها وانا اللى حسيت ساعتها ان انا اللى اتشليت لما سمعته

معرفتش اقوله ايه ولا ارد عليه واتخرست

طب ازاى قالها كده وهو بيضحك وقالها بكل بساطه كده سبحان الله ربنا مصبره

وافتكرت لما الاقى الناس فى وقت خنقه ولا لما ظروفها تبقى وحشه ومخنوقه وانا اول واحده

اد ايه بنبقى كارهين الدنيا ونقول( اووف) (عيشه تقرف) و(ايه القرف دا انا زهقت)

طب نفكر كده فى حياه غيرنا نفكر فى اللى مش بيعرف يتحكم فى حركته ابسط حاجه بنعملها ومش حاسين بقيمتها

لما بنحتاج حاجه بنجيبها بنفسنا غيرنا بيستنى لما حد يجيله ويساعده يمكن يفضل بالساعات مستنى

ويمكن فى الاخر مش بيلاقى حد فاضى يشوف هو كان عايز ايه

المفروض نحمد ربنا على الصحه اللى مش عارفين قيمتها وغيرنا هو اللى حاسس بيها

مش لازم النعمه تروح مننا عشان نعرف قيمتها

دى اغبى حاجه حصلت اليوم دا واعتقد هيفضل اثرها معايا شويه وهفضل حسه بالذنب كل ما هشوفه