رساله الى الرئيس

والله العظيم احنا بنحب البلد دى وبنحبك وصعبان علينا اللى ماتوا فالمظاهرات ودم كل واحد نزف فيها.. دمنا غالى اوى

بس عايزينها تبقى احلى .. عايزينها تبقى انضف مش عايزن فساد

مش عايزين ناس تسرق حقنا وتتمتع بفلوسنا واحنا مش لاقيين حاجه ... مش عايزه الاقى حد مش لاقى حق الرغيف مش عايزه الاقى واحد مش عارف يلبس تقيل فالشتا ... مش عايزه اشوف واحد نايم هو اهله فالشارع ....مش عايزه الاقى واحد فى العيد مش عارف ياكل لحمه ...مش عايزه اشوف الشباب متخرج ومش لاقى شغل وقاعد ع القهاوى يا صايع فالشوارع ... وااللى يلاقى شغل يلاقى ب 200 ولا 150 جنيه ؟؟؟؟؟؟ ايه ان شاء الله يعملوا ايه الملاليم دى فالايام دى دا لو قعد ياكل عيش وجبنه بس كل يوم مش هيكفيه حاجه...فى كل الدنيا فى اعانه بطاله 500 جنيه المفروض كل عاطل من حقه ياخدهم وحد ادنى للاجور 1200 جنيه دا اقل حاجه ... مش عايزين تعملوا اعانه بطاله يبقى تشغلونا واهو نعمل بالفلوس اللى هنخدها... دا احنا بقينا بنلاقى الاب بيقتل عياله عشان خايف عليهم من الفقر والابن اللى بيقتل امه عشان 50 جنيه الناس بتاكل بعضها خلاص .... كلو دلوقتى بقى عايز يسيبها ويهج منها ويطير على بره وشباب البلد دى اللى هما مستقبلها هيتدمر

من حقى الاقى حلم كبير للبلد احلم بيه واشارك فيه ... فين خير البلد دى فين؟؟؟ بترولها فين ؟؟؟عائد السياحه فين ؟؟؟ عائد قناه السويس فين ؟؟؟ الحاجات اللى بنسمع عنها بس مش بنشوف منها حاجه مش حاسين بحاجه
الاكل ملوث والميه ملوثه والهوا ملوث بقش الرز والبلاوى بتاعت مصانع السماد وغيرها وكل حياتنا تلوث فى تلوث واغذيه مسرطنه ودم مسرطن احنا بقينا منسواش مليم للدرجه دى

مش عايزه واحد زى خالد سعيد يتقتل ويستحل ويقولك طوارئ يلعن ابو الطوارئ لما ام تربى وتعلم وتطلع راجل سند وضهر ليها فالدنيا ونفسها تفرح بيه تلاقيه فى يوم وليله فى قبره من غير ذنب ... وسيد بلال اللى اتاخد فالرجلين وغيرهم كتييير

احنا لو مكناش بنحبها مكنش حد عمل كده بس فاض بالناس خلاص
بس ايييييييييه العجرفه والتناكه بتاعه الحكومه دى لحد دلوقتى مفيش بيان ولافى وزير حس على دمه وقدم استقالته
كنت تقدر تهدى الناس يا مبارك بسهوله جداااااا ابسط حاجه شيل الوزاره دى مبدئيا واعلن انك مش عايز تنزل انتخابات تانى
انت كده كده هتسيبها مش فاضل لك كتير لو مش سبتها بمزاجك هتسيبها باراده ربنا خلينا نفتكرك بحاجه حلوه


على فكره يا مبارك انا بحبك جداااااا وانا صغيره وكان ليك صوره عندى فى المفكره بتاعتى ولما انت تعبت وسافرت فرنسا انا كنت بدعيلك وعيطت عشانك ....لانى مكنتش شايفه لينا كبير غيرك ... لما كنت بشوفك تنزل المصانع وتتكلم مع العمال وتقعد مع الفلاح وتتكلم مع الست العجوزه وتسلم على العيل الصغير وتضحك وتهزر معاهم ... بس للاسف انا لما كبرت واتخرجت وملاقتش شغل ولما اتعاملت مع الناس اللى اقل منى ولما احتكيت بالغلابه وشوفت حالهم وهما عايشين ازاى تحت خط الفقر ساعدنا واعمل حاجه لينا

ثوره 25 يناير .... ثوره الغضب

ايه اللى حصل انهارده دا والله مش مصدقه

اخيرا ...الشعب فااااااااق... الشعب صحى
كنت فاكراها هتعدى زى اى حاجه بتعدى وكلام وخلاص بس المره دى غير

اللى اتحركوا للتغيير كتير جدااا
كنت فاكره ان شويه شعارات 98 او 10 الاف بالكتير واحد ينزلوا فى كذا محافظه وخلاص
هيصرخوا ويزعقوا شويه ويتخانقوا مع الامن ويروحوا

بس اللى حصل غير كده العدد مش قليل

ياترى
هنقدر نعملها ولا مش هنقدر
ان شاء الله هنقدر
طالما من جوانا عايزين نتغير هنتغير
حسه ان بعد ما كنا زى الاموات ...كلو قام ونفض التراب اللى عليه .... بطل سلبيه وجبن وخوف
من دلوقتى محدش هيقول وانا مالى ... كله مالنا

مطالبنا معروفه وبسيطه

مش عايزين بطاله
مش عايزين فقر
مش عايزين غلاء
مش عايزين طوارئ
عايزين عداله اجتماعيه
عايزين علاج على نفقه الدوله للغلبان قبل الغنى بدون شروط


اذا الشعب يوما اراد الحياه فلابد ان يستجيب القدر

حول العالم فى 200 يوم

ياااااااااااااااااه الكتاب دا انا بعشقه
فكرنى بايام حلوه اوى
ايام اولى ثانوى كانت سنه هدنه....بالنسبالى مكنتش بفتح فيها كتاب
مكنتش اعرف حاجه عن ال16 ماده اللى عندى

علاقتى بالكتاب دا بدات ازاى!!!!!!!

كنت بحب اسمع الراديو ديما وانا بعمل نفسى بذاكر D:D:
ماما قالت لى وسيبك من اذاعه الاغانى اللى بتسمعيها دى
واسمعى محطه البرنامج العام تسمعى حاجه تنضف ودنك شويه

قلت نجررررررب مش هخسر حاجه

كان فى برنامج اسمه ((قراه فى كتاب )) او(( قراءه فى كتب شكلت وجدان مصر))
مش فاكره بالظبط الاسم بس بيجى الساعه 10 وبيقعد 5 دقايق

واعتقد لسه بيتذاع لحد دلوقتى فى نفس المعاد
لما سمعته كان بيتكلم عن الكتاب دا
الكتاب شدنى وشدتنى الرحلات اللى فيه وطريقه وصفه لوشوش الناس اللى بيقابلهم
والشوارع وللاكل بتاع كل بلد ولبسهم و روائح الاماكن
والبلاد اللى سافر ليها بلاد اعتقد ان ممكن اموت وانا مشوفتهاش غير فالكتاب دا
.
.
.
رحت مكتبه المدرسه سالت ع الكتاب فرحت جداااا انى لاقيته
بس طبعاااااا
كتاب زى دا مبيطلعش استعاره بتاتااااا
بس لانى واصله خلتنى اخده و قعد معايا فتره جامده ملحقتش اخلصه للاسف بس كان لازم ارجعه :(


الكتاب تقريبا اكتر من 650 صفحه كبير جدااا مهما كنت سريعه فالقرايه الكتاب دا
محتاج الواحد يقراه بهدؤ وبمزاج عشان يعيش الجو معاه
دلوقتى بقى هسترجع ذكرياتى الجميله مع الكتاب وهقراه من اول وجديد

بس طبعاااا فرق شاسع بين الكتاب وورقه الاصفر القديم وريحه الورق والطباعه القديمه

ولما يبقى فى حرف ممسوح وتخمن دا حرف ايه
لما يبقى فى ايدى وبحاول متحركش عشان عينى مش تزوغ عن السطر
وبين القرايه ع الكمبيوتر :((
بس هحاول اتغلب على رخامه الكمبيوتر واستمتع بقرايه الكتاب على قد ما اقدر


لو حد يحب ينزل الكتاب

تحميل الكتاب


تحياتى ..."

عذرا سيدى .......فقد سقط القناع

حمقـــــاء

تلك المرأه التى تعتقد انها ملكت قلب وعقل رجل واحكمت قبضتها عليه

سواء بحبها او بجمالها او باخلاصها او بصفاتها التى يتغزل دوما بها


تاكدى ســيدتى

انه كلما ازدتى ثقه فى عشقه ...فكل كلمه يلفظها لسانه

انما هى خنجر يمهد بها لاصطياد فريسته المسكينه


واعلمى ان ثقتك فيه


ما هى الا دليل على غباءك وستكتشفى يوما مدى سذاجتك بنفسك

ستندمى على اندفاعك فى ارضائه

على حساب نفسك

ستجدى ان كل ما فعلتيه من اجله ذهب هباء مع اول عاصفه تمر عليه


تذكرى عزيزتى

ان الرجل ما هو الا حيوانى آدمى

تربى على ان ياخد فقط وتعلم اذا اعطى شيئا

فأنما يفعل... لكى يحصل منك على مقابل اضعاف ما اعطاكى اياه

فاحذرى يوما تخسرى فيه وتكتشفى

انك سيــدتــى

اكبر حمقاء على وجه الارض

((استوصوا بأهل مصر خيرا))

بسم الله الرحمن الرحيم ((كُلَّمَا أَوْقَدُوا نَارًا لِلْحَرْبِ أَطْفَأَهَا اللَّهُ )) صدق الله العظيم (المائده64
ـــــــــــــــــــــــــــــــــــــــــــــــــــــــــــــــــ
2010

بالنسبه لى كانت سنه كئيبه وما صدقت خلصت

يمكن مفيش حاجه كويسه حصلت فيها غير انى اتخرجت والحمد لله

كنت مستنيه

2011

ونفسى انها تبقى احلى من اللى قبلها

لكن للاسف ومن اول تلت ساعه فيها والبلد كلها على بعضا اتقلبت

والاحتفالات بقت جنازات والبلد اتقلبت فوقيها تحتيها

اشاعات ماليه البلد

بجد حاجه صعبه منهم لله اللى عملو كده ناس معمول لها غسيل مخ

ميعرفش ان ربنا قال .. من قتل نفسا بغير ذنب كانما قتل الناس جميعا..

فاكر ان اللى عمله دا بيخدم دينه

ميعرفش انه هتيحرف فى نار جهنم باذن الله

بس احسن حاجه ان الشعب حس بالايد اللى بتخرب وراه وكلنا بقينا ايد واحده

اللى عمل فجر القنبله مكنش قصده ال21 اللى راحو فى الكنيسه ... لا كان قصده ان ال 82 مليون يدبحوا فى بعض

والحمد لله خاب ظنه ويا حسرته دلوقتى ..

ميعرفش ان اهل مصر فى رباط الى يوم الدين



بسم الله الرحمن الرحيم (( وَلَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَاناً وَأَنَّهُمْ لا يَسْتَكْبِرُونَ)) صدق الله العظيم

البقــــــاء لله