تخاريف اخر ايامى

كمان كام يوم مصر هتحتفل بعيد الجلاء .......وانا هحتفل بعيد ميلادى

هخلص سنه كمان من عمرى

وبرده هسال نفسى نفس السؤال اللى بساله كل سنه

ياترى اللى جاى قد اللى راح ؟؟؟ ولا اقل ؟؟ ولا مبقاش فاضلى كتيييير

وطبعا مبعرفش الاجابه

وياترى السنه اللى جايه هيكون مكتوب لى فيها ايه ؟؟؟؟ يارب تبقى احسن من الاتنين اللى قبلها

طب انا طول عمرى متعوده عيد ميلادى بيجى فى الامتحانات

دى اول مره عيد ميلادى يجى واكون راكنه فى البيت .. اقصد عاطله يعنى D: يمكن دا الجديد السنه دى

طب مين اللى هيفتكرنى ويقولى كل سنه وانتى طيبه !!!!!!!!

عارفه يا ماما لو نسيتى تقوليلى كل سنه وانتى طيبه زى السنه اللى فاتت .... هزعل منك ...مش هزعل اوى انتى عارفه انى بحبك ومبزعلش منك .. بس مش حلوه علياء تقولهالى قبل منك

عايزه اسمعها منك الاول

وطبعا انتى اللى بتفكرى بابا ان انهارده عيد ميلادى زى كل سنه

والبت علياء هتفتكر عيد ميلادى زى ما انا بفتكر عيد ميلادها ولا هتنسى اممممم عادى يعنى ممكن تنسى ما احنا مبقناش مع بعض زى ايام الجامعه ...... بس لا لا مش هتنسى لو كنت انا نسيت عيد ميلادها كانت هى تنسى عيد ميلادى


ياااااترى هتجيلى رساله الساعه 12 ............... !!!!!!!!!!!!

طب انا السنه دى مفيش حاجه حلوه حصلت لى غير انتى اتخرجت الحمد لله يمكن دى الحسنه الوحيده اللى فيها

من ساعه ما دخلت فالعشرينات وانا كل سنه باخد مطبات لما اتبهدلت

ياااااااااااه انا مش واخده بالى .............. انا كبرت اوى وقربت اعجز

طب هى الايام فعلا زى ما كانو بيقولوا زمان بتجرى بسرعه ليه.. سنه ورا سنه ورا سنه واحنا مكناش بنصدق

دا انا كمان 8 سنين هدخل فى ال30 يااااااااااااخبر وشويه ع 40 يا لهوووووووووووى

دا انا كنت بفرح اوى لما كنت بكبر كل سنه بحسبها ولما بقيت 10 سنين كنت طايره من الفرحه

طب والعمل فى القطر اللى ماشى ومش عايز يقف دا



يلا الحمد لله على كل حال هستنى بقى 365 يوم عشان اعرف اجاوب على كل الاسئله دى


ليا طبعا امنيات السنه الجديده

ان ربنا يطولى فى عمرك يا ماما ويخليكى ليااا ويفرحك بيا وباخواتى ياااارب

ويارب السنه دى اقرب فيها لربنا اكتر من اى سنه عدت واكتر من السنه دى كمان


اللهم أحيني ان كانت الحياة خيرا لي وأمتني ان كان الموت راحه لي