مش زى الافلام

الاغنيه دى بتاعه العسيلى( اتارى الدنيا مش حلوه كلها ......... مش زى الافلام اللى هو بيحب يخوشها )


فكرتنى بموقف حصلى كده

كنت خارجه بعد يوم عصيب من ايام الجامعه

حاولى الساعه 4 كده

لسه خارجه من بوابه الجامعه انا والانتيخ بتاعتى


وماسكين ودان بعض لغايه ما نروح بنسلى طريقنا


المهم مره واحده




عااااااااااااااااااااااااااااااااااااااااااااااااااااااااااااااااااا




الصوت هز الشارع كلووو



والناس بتبص عليا




طبعا دا كان صوتى


ايه اللى حصل




حته عربيه الله ينور وفيها واحد زى بتوع شباب النيل كده


ولا غلطه بجد


الكابتن شكله لسه مستلم العربيه جديد وشكله كمان لسه متعلم يسوق


راح داس على رجلى الله يسامحه

بس كانت احلى صدفه فى حياتى

فقدت الوعى كده يجى دقيقتين وانا سانده على صحبتى

هوباااااااااا والشارع اتلم عليا

ونزل هو جرى بيتطمن عليا طبعاااااا

وهو خايف وبيقولى هاااا انا اسف حصل لك حاجه

وببصينا فى عين بعض وكيوبيد عمل شغله الله ينور بالاسهم بتاعته

وانا مسهوكه فيها ع الاخر وعامله انى هموت خلاص خلاص حصل خير يا استاذ

وهو ابدااااااااا راسه والف سيف يتطمن عليا وياخدنى اعمل اشعه

اا اسف يا انسه والله مخدتش بالى


فى معمل اشعه هنا لازم نطلع ونتطمن على رجلك


انا مش هسامح نفسى لو حصلك حاجه


وبعد الحاح شديد منه وسهوكه منى طلعنا وعملنا الاشعه وخلصنا



واحنا نازلين ع السلم


قالى انا لازم اوصلك لحد البيت واتطمن عليكى انك وصلتى بالسلامه



وبالمره اشوف الوالد واتعرف عليه :)) :)) :))



بااااااااااااااااااااااااااااااااااااااااااااااااااااااس


ايه

انتوا صدقتوا


دى كلها افلام منا قلت الحياه مش زى الافلام

بس يعنى لو موقف زى دا حصل فى فيلم عربى اكيد كان هيبقى السيناريو زى اللى انا الفته دا :))

ال يعنى شاديه خارجه من الجامعه وعماد حمدى هو اللى سايق العربيه بلا خيبه


دا حتى مكلفش خاطره وينزل يقولى انا اسف


انا طبعا بعد ما ادركت الموقف وفوقت من الخضه رحت رازعه بايدى ع العربيه


وقلت له ايييييييييييييه انت اعمى ما تفتح اتعلموووها قبل ما اتبقوا تسوقوا


ورحت خابطه المرايه بتاعه العربيه كرد فعل عنيف منى على اللى عمله


بس والله كان عنده بوادر احساس بالذنب مرضاش يمشى غير لما لاقانى ماشيه مع صحبتى عادى


هه يلا ملناش نصيب فى الافلام بس والله كانت رجلى بتوجعنى بجد

:)) :)) مش افلام :)) :))